Дүвүлүг хаттар малчын турлагларже аргыжылганы нарыыдаткан

Үргүлчүлелдиг хар чаап, ону дүвүлей хадып каапканы, малчын турлагларже аргыжылганы бергедедип, малчыннарга нарын байдалдарны тургускан. Тываның Көдээ ажыл-агый болгаш аъш-чем яамызы малдың күш-шыдалы эки болгаш амдыызында кыштаглаашкын чогумчалыг эртип турарын дыңнаткан.

Ындыг болзажок, кыштагларже база муниципалдыг оруктарны үе шаанда аштаарын күштелдирип, республиканың курлавырындан мал чемин ажыл-агыйларга үндүрүп, малдың баш санын чедирбес дээш деткимче ажылдарын чорударын Тываның Баштыңы Владислав Ховалыг айыткан.

Республикада харның кылыны ортумаа-биле 20-30 см, ол эрткен чылдарга деңнээрге ындыг-ла кончуг улуг эвес, ынчалза-даа хаттар малчын турлагларже аргыжылга оруун хөртүктелдир, дуй хадып, байдалды нарыыдаткан. Ылаңгыя Мөңгүн-Тайга база Бай-Тайга кожууннарда байдал берге.

Январьның 18-тен хадаан хат Мөңгүн-Тайга кожуунда «Мугур-Аксы – Кызыл-Хая» автооруктуң “Ак-Хем” арттынче транспорт чоруун бергедеткен. «Орукчу» КХН-ниң орукчулары хөртүктерни аштаан. Өвүр кожууннуң «Хандагайты – Дус-Даг» автооруунда “Тээли” арт кыры-биле чорууру берге. Ук автоорукту «Өвүрнүң орук септелге-тудуг эргелели» КХН ажаап-карактап турар. Барыын-Хемчик кожуунда «Чүскү» арт кырынга байдал база-ла таарымчалыг эвес турган. Бо хүнде орукту аштап аргылаан, шупту талаже аргыжылга ажыттынган. Бай-Тайга кожуунда Кара-Хөл суурже орукту база дуй хадаан, аргыжылга бергедээн. «Ак-Довурактың орук септелге-тудуг эргелели» КХН орук участогун бүрүн аштаан.

Тываның орук-транспорт комплекизиниң сайыды Шораан Чыргал-оолга оруктар атшаашкынын база кирген шупту дыңнадыгларны бодунуң хууда хыналдазынга алыр даалганы Владислав Ховалыг берген. Аар орук техниказы чедишпейн турар болза, орук организацияларының автопарыгын чаартыр аргазын көөр даалганы яамының удуртукчузунга берген.