Дагдыныкчы башкының үнелиг белектери

Бай-Тайга кожууннуң Тээли сумузунда «Бай өнчү» аттыг музейге Валерий Ооржак аалдап келгеш, эртем талазы-биле бодунуң ажылдарын база чонар-даштан чазаан ажылын белекке бергенин чагырга чери дыңнаткан.

Хүндүлүг аалчы Тээли сумузунда улусчу ус-шеверлер техникумунуң сургуулдары-биле солун ужуражылганы эрттирип, оларга бодунуң чагыг-сүмелерин болгаш арга-дуржулгазын дамчыткан.

Валерий Окпан-оолович – Тываның күрүне университединиң баштайгы проректору, төөгү эртемнериниң кандидады, эртемден, чонар-даш сиилбиир талазы-биле улустуң мастери, дагдыныкчы башкы.

Эртемденниң ажылдары келир үениң салгалынга болгаш кожууннуң музейинге эң-не үнелиг белек болган.