2017 чылдан эгелеп Тывада өскүс болгаш ада-иезиниң хайгааралы чок арткан уругларны деткээн «Дагдыныкчылар: чанында эвес, а кады!» төлевилелди боттандырып турар.
Дагдыныкчылар ниитилел амыдыралынга уругларны кижизидеринге болгаш чаңчыктырарынга деткимчени көргүзүп турар. Ооң ачызында уруглар боттарының арга-шинээн, бот-медерелин, хууда шынарларын сайзырадыр аргалыг.
Күүсекчи эрге-чагырга болгаш федералдыг органнарның девискээр эргелелдериниң удуртукчулары болгаш оралакчылары-ла Тываның кадет корпузунуң ийи-үш өөреникчилерин хүлээнип, дагдынып алганнар. Чамдык кадеттер школаны дооскаш, ортумак өөредилге черинде өөренип турза-даа, дагдыныкчылары-биле харылзаазын тутпушаан.
Дыка хөй удуртукчулар Чаа чыл болгаш Рождество байырлалдарында уруглар-биле ужуражып, чигирзиг белектерин чедирип, кышкы дыштанылгазын ажыктыг болгаш солун кылдыр эрттиришкен.
ТР-ниң Чазак Даргазының оралакчызы Орлан Сарыглар, Россияның Социал фондузунуң Тывада салбырының, Россияның кеземче күүселдезиниң Тывада эргелелиниң, өөредилге, орук-транспорт, чуртталга-коммунал ажыл-агый, кадык камгалал, культура яамыларының, Ветеринария албанының, Күрүнениң чуртталга инспекциязының болгаш тудуг хайгаарал албанының удуртукчулары болгаш оон-даа өскелер бодунуң хүлээнген оолдар, уругларынга четкен.
«Дагдыныкчылар уругларга профугланыышкынныг ужуражылгаларны, ажылдап турар черлеринче экскурсияларны, шиилерже, концерттерже, доштуг чуңгуже, чогаадыкчы мастер-класстарны, оюннарны, мөөрейлерни органиазстап, суй белектер болгаш чигирзиг белектерни тывыскан. Уруглар оларның сургакчылаашкыннарын, ажыл-ижин, амыдыралчы арга-дуржулгазының дугайында чугааларны аажок сонуурганнар» – деп, Тываның Өөредилге яамызы демдеглээн.
ТР-ниң аныяктар херектериниң сайыды – Россияның Маадыры Буян Куулар школа-интернат өөреникчилери-биле ужурашкан, спорт болгаш кадык амыдырал-биле кезээде өңнүктежип чоруурун оолдар, уругларга чагаан.
«Мындыг хемчеглер уругларга чүгле байырлалдың сеткили-хөөнүн оттурар эвес, а уруг бүрүзү кол черде болгаш аас-кежикке төлептиг дээрзин көргүзүп турар. Дагдыныкчыларның кичээнгейи болгаш сагыш човаашкыны уругларга кайгамчык чүүлдерге бүзүрелди болгаш улуг улустуң талазындан деткимче бар деп бүзүрээринге дузалаар» – деп, Тываның кадет корпузунуң өг-бүле кижизидилгезинге деткимче төвүнүң удуртукчузу, «Дагдыныкчылар: чанында эвес, а кады!» төлевилелдиң куратору Анжела Куулар дыңнаткан.