Шагаан-Арыгга «Ада-чурт камгалакчылары» күрүне фондунуң Улуг-Хем кожуунда салбырының ажылдакчылары тускай шериг операциязының хоочуннарының аразынга эштип чаржыр маргылдааны эрттиргенин чагырга чери дыңнаткан.
«Эне-Сай» эштир черге маргылдаа хостуг хевирге эрткен. Аңаа 12 кижи киришкен.
Харык-шинээ кызыгаарлыг улус аразынга 25 метрге Альберт Биче-оол чемпионнаан. Ийиги-үшкү черлерге Алексей Агван, Эдуард Сендир-оол төлептиг болган. Тиилекчилер өртектиг белектер-биле шаңнаткан.
Дайынчы хөделиишкиннер хоочуннарын 50 метрге чарыштырган түңнелинде, Буян Күжүгет бирги черни чаалап алган. Ийиги черде Алдын-Херел Дамыймаа, үшкү черде Омак Монгуш. Оларга акша сертификаттарын тывыскан.
Маргылдаага шаңналдыг черже кирбээн-даа болза, идепкейлиг киржилге дээш шупту хоочуннарны шаңнап-мактаан.
Тускай шериг операциязының хоочуннарының ассоциациязы, «Ада-чурт камгалакчылары» күрүне фондунуң кожуунда салбыры, «Теси», «Дамырак» садыглары деткикчилээн.
