Дайынчы оолдарга «демир аъттарны» дамчыткан

Чоннуң чаңгыс эп-сеткилиниң чылында республиканың чону бир демин көргүзүп, Ниити российжи улусчу фронтунуң болгаш «Россияның демир-оруктары» ажык акционерлиг ниитилелдиң чарлааны «Автопоезд» акциязынга катчып, кыска үе дургузуда орук чок черлерни эртип шыдаар, тускай чепсеглеттинген 41 автомашинаны тускай шериг операциязында киржип турар дайынчыларже чоруткан.

Тываның Баштыңы Владислав Ховалыг Россиядан эң хөй автомашинаны Тыва чорутканын соцчеткилерде бижээн. Ол Тиилелге хүнүнүң бүдүүзүнде «демир аъттарны» бистиң шериг оолдарывыска дамчыткан.

Бии-Хем кожууннуң чагырга даргазының хүлээлгезин күүседип турар Владимир Байыр-оол Ленинка арбанындан чаңгыс чер-чуртуу кожуундан чоруткан автомашинаны хүлээп алганын дыңнаткан.

Бүгү чүүлдү тиилелге дээш!