Дайынчыларга чажыртынып шыптынар четкилер

Өвүр кожууннуң «Чөленгииш» херээженнер клуву эки турачы ажыл-чорудулганың доктаамал киржикчилери дээрзин чагырга чери дыңнаткан.

Бо удаада олар тускай шериг операциязында киржип турар дайынчыларга чажыртынып шыптынар четкилерни кылган.

“Чажыртынар” четкилер-биле дайынчыларның чурттап турар черин, машина-техниказын, шериг объектилерин шып алырга, эскертинмес болуп, камгалаарынга улуг дузалыг.

«Улусчу фронт. Бүгү чүүлдү тиилелге дээш!» төлевилелдиң чорудуу-биле Тывадан тускай шериг операциязында киржип турар дайынчыларга күскү ачы-дуза чыылдазы уламчылап турарын сагындыраал.

Күс дүжүп, агаар-бойдус сооп эгелээни-биле шериг албан-хүлээлгелиглерге чылыг идик-хеп, эттээн алгы-кеш, чылыг чоорганнар, удуур-шоодайлар, дизельдиг генераторлар дээш оон-даа өске чүүлдер чугула херек. Ол ышкаш техниктиг дериг-херекселдер садары-биле чагыглар хөй болуп турарын Ниити-российжи улусчу фронтунуң Тывада салбыры дыңнаткан.

Тускай шериг операциязында киржип турар дайынчыларга ачы-дуза чыыр пункт дараазында адрестерде ажылдап турар: Кызыл хоорай, Кызыл партизан кудумчузунда 30 дугаар бажың, каб. 106.; Кызыл хоорай, Кочетов кудумчузунда 30 дугаар бажың, каб. 26.