Иштии-Хемниң чурттакчы чону одаар ыяш-дажын четчелеп алганын чагырга чери дыңнаткан. Ынчалза-даа эр кижиниң дузазы херек өрегелер бар.
Дуза херек чаңгыс чер чурттугларынга ыяш белеткээри-биле суму чагыргазының коллективи база суурнуң эрес-кежээ, идепкейжи эр улузу демнежип алгаш, одаар ыяшты белеткээн.
Тускай шериг операциязында киржип турар чаңгыс чер чурттуг дайынчыларның аваларынга кыжын одаар ыяжын белеткээш, бажыңнарынга чедирип берген. Ол ышкаш, күш-ажылдың хоочуну Д.Ч. Ондарга база кургаг одаар ыяшты хирээлеп берип, дузазын каткан.
Одаар чер бажыңда чурттап чоруур көдээ ишчилерге кыжын кол-ла чүүл – ыяш-дашты чедер кылдыр белеткеп алыры. Дайынчыларның авалары база хоочун дуза чедирген иштии-хемчилерге четтиргенин илереткен.
Иштии-Хем сумузу тайга эдээ чер болгаш, эрте-ле хар чааптар. Октябрь эгезинде-ле кыштың тыныжы кээп, баштайгы харын бызапкан. Ыяш-даш белеткеп албас болза, узун соок кыш хаарып келир. Эки чүүл – тайга эдээнде болгаш ыяштаар чери чоок.
