Дайынчыларның фронтучу ада-иезинге медальдарны тывыскан

ТР-ниң Дээди Хуралының депутады Эрес Хуурак депутаттар корпузунуң мурнундан Иван биле Мария Обрезановтарга «Тускай шериг операциязынга деткимчези дээш» деп парламентиниң медальдарын тывыскан.

Тывадан барган дайынчыларның фронтучу ада-иезиниң бажыңы – бистиң оолдарга шериг хөделиишкиннерниң мурнуку одуруунче чоруур мурнунда күш кирип, чаглактаныр чери апарганын билир бис.

Тускай шериг операциязының эгезинден тура Обрезановтар дүне-хүндүс дивейн бистиң дайынчы оолдарывысты уткуп, эмнелгелерден балыглатканнарны үндүрүп, бажыңынга дыштандырып, ашкарып-чемгерип, садыглардан херектиг чүүлдер дилеп, садып берип, машина-техниказын септежип, суугулар база кылып четтигип турар.

Бистиң шериг оолдарывыска болгаш өске-даа дайынчыларга ада-иези дег дузалап, сагыш човап, чылыг-чымчак сөстери-биле деткип турар буянныг өг-бүлеге депутат база катап четтиргенин илереткен.