Даш чонукчуларының хүнү – Бай-Тайгада

Бай-Тайга кожууннуң төвү Тээли сумузунга чонар даш сиилбип чазаар шеверлерниӊ хүнүн уткуштур Тываның чонар-даш чонукчуларының эвилелиниң даргазы Лориса Норбу болгаш кежигүннери, Тываныӊ чонар даш уран чүүлүн үнелеп деткип чоруур кижилерниӊ бирээзи – Федералдыг Хуралдың Федерация Чөвүлелинде Тывадан сенатору Дина Оюннуң дузалакчызы аалдап чораанын культура эргелели дыңнаткан.

Оон аңгыда Тываның барыын кожууннарының даш чонукчулары: Орлан Мажаа (Эрзин), Артыш Донгак (Чөөн-Хемчик) болгаш өскелер-даа киришкеннер.

Аалчылар В.Д. Иргит аттыг "Авырал" немелде өөредилге төвүнге, В.Б. Кара-Сал аттыг Тээлиниң ортумак школазынга, Х.К. Тойбу-Хаа аттыг уругларның уран чурулга школазынга барып, боттарының арга-дуржулгазын дамчыдып, өзүп олурар даш чонукчулары-биле ужуражылганы эрттирип, кожуун музейиниң ажыл-чорудулгазын улуг сонуургал-биле үнелээннер.

Байырлыг ужуражылганы Хемчик сумузунуң Культура одаанга чон-биле уламчылаан. Кожууннуң шеверлериниң чонар даш-биле сиилбип кылган ажылдарының болгаш дүктен кылган кылыглар делгелгези болуп эрткен.

Бай-Тайганың Төлээлекчилер хуралының шиитпири-биле кожуун баштыңы Экер Байс үре-түңнелдиг ажылдап чоруур даш чонукчулары – Сарыг-оол Бышкак, Экер-оол Салчак, Аяс Кагай-оол «Бай-Тайга кожууннуң Улустуң ус-шевери» деп хүндүлүг аттарны тывыскан.

«Бай-Тайга кожууннуң алдарлыг ус-шевери” деп аттарга Кара-оол Бичелдей, Сергек Хертек, Ай-Демир Шыырап, Шораан Ендан олар төлептиг болганнар.

Бай-Тайга кожууннуң чагырга даргазының хүлээлгезин күүседип турар Аржан Хертек аалчыларга өөрүп четтиргенин илередип, чогаадыкчы ажыл-агыйны болгаш чонар-даштың сайзыралын делегей деңнелинге чедир хөгжүүрүн күзээн.