Бөгүн В.Көк-оол аттыг Национал хөгжүм-шии театрынга ТР-ниң Дээди Хуралының Чаа чыл елказынга республиканың аңгы-аңгы булуңнарындан тускай шериг операциязының киржикчилериниң ажы-төлү киришкен.
Дээди Хуралдың хораа даргазы Людмила Осмоловская депутаттар корпузунуң мурнундан байыр чедиргеш, Чаа чылда уругларның чырык чаагай күзелдери шупту бүдерин, эки өөредилгени, чогаадыкчы болгаш спортчу чедиишкиннерни күзээн.
Театрның артистери уругларга Салтан хаан дугайында тоолчургу көргүзүгнү бараалгаткан. Байырлалдың ийиги кезээнде уругларны оюн-тоглааже чалаан. Олар Соок-Ирей биле Харжыгаш база тоол маадырлары-биле кады ырлап-самнап, Шивини долгандыр ырлажып, хөглээннер.
Чаа чылдың кол оюн-тоглаазынче чалатканнарның аразында Сарыг-Септиң С.К. Тока аттыг 2 дугаар школазының тоску классчызы Арина Оюн база бар. Ол эмчи мергежилин шилип алган болгаш Новосибирск хоорайже өөренир деп турар. Чаа-Хөл кожуундан Күзел Олчанмай чурагайлыг технологияларга сонуургалдыг. Ооң-биле кады Ак-Дуругдан ийи эжи келген. Кызылда президентиниң кадет училищезинден сески классчы Кудер Монгуштуң ачазы тускай шериг операциязынга 2022 чылда чок болган. Маадырның улуг оглу ачазының изин салгап, шериг албан-хүлээлгелиг болурун шилип алган. Кадет чылгы малга ынак, аът чарыштарында база киржип турар.
Чаа чыл байырлалының шупту киржикчилеринге белектерни үлээн.
Чуруктарны Дээди Хуралдың парлалга албаны тырттырган