Дээди шаңналды Айдаш Барыңмаа чаалап алган

К.Б. Ондар аттыг Тыва үндезин культура төвүнге Шагаа байырлалынга тураскааткан тоолчулар мөөрейинге тос тоолчу киришкен.

Тоол мөөрейиниң түңнелдерин төп дыңнаткан. Дээди шаңналды Айдаш Барыңмаа (Улуг-Хем кожуун) чаалап алган. I чер – Начын Салчак (Бай-Тайга кожуун), II чер – Сыдым-оол Куулар (Өвүр кожуун), III чер – Күдерек Иргит (Мөңгүн-Тайга кожуун).

Тускай шаңналдар: "Хөгжүмнүг үделге" – Лопсан Мундукай (Улуг-Хем кожуун), "Чогаадыкчы идепкей" – Айлаңмаа Дамыраң (Бай-Тайга кожуун), "Амгы үениң технологиязын ажыглааны" – Саяна Лодай-оол (Эрзин кожуун), "Үлегерлиг хоочун" – Ульяна Лойгу (Эрзин кожуун), “Угаадыглыг сөзүглел" –Өнермаа Көк (Эрзин кожуун).

Тыва үндезин культура төвү киржикчилерге кайгамчык тоол делегейин ам-даа шинчилеп, ооң алдын дүлгүүрүн дараазында салгалдарга ажыдып бээри-биле улуг-улуг чедиишкиннерни күзээн.

Өгбелеривистиң мерген угаадыглары сиңген, тыва чоннуң сүзүүн октаргай-биле тудуштурар, езу-чаңчылдарывыстың дөзү болган тоол ыдар чаңчылывыс сайзыраар-ла болзунам!