Дээди шаңналды Чеди-Хөлден Далай Дамдын чаалап алган

Сүт-Хөл кожууннуң Алдан-Маадыр сумузунуң ажыл-ишчи малчыннары чайгы үеде каас-чараш бойдус чурумалдыг Манчурек деп черде чайлаглап турарлар.

Алдан-Маадыр сумузунуң ажыл-ишчи чону чымыштыг ажыл-иш – хой кыргылдазы болгаш чуулдазы доосту бээрге, Манчурекке ыдыктыг оваа дагылгазынга киришкен. Байырлал үезинде Тыва улустуң хөөмейжизи Х.С. Ооржактың 90 харлаан юбилейинге тураскааткан республика чергелиг хөөмей-сыгыт фестивалы, ча адарынга мөөрей, хол бөмбүүнге маргылдаа, хүреш, чадаг чарыш, аът чарыжы, Манчүректиң малчыннарының аразынга суму чергелиг «Ыраажы малчын» деп мөөрей база эрткен.

Тыва Үндезин культура төвү Хунаштаар-оол Ооржак өгбениң 90 харлаанынга тураскааткан «Агып баткан Алажымны» деп республика чергелиг хөөмей мөөрейиниң түңнелдерин дыңнаткан.

Дээди шаңналды Чеди-Хөлден Далай Дамдын чаалап алган. Бирги черге Улуг-Хемден Айгор Көшкендей, ийи черге Барыын-Хемчиктен Айдың Быртаан-оол, үшкү черге Чөөн-Хемчиктен Мөңгүн-оол Монгуш төлептиг болган.

«Тергиин борбаң» – Кызыл хоорайдан Чолдуг Көшкендей, «Тергиин сыгыт» – Чөөн-Хемчиктен Омак Ооржак, «Эң улуг назылыг хөөмейжи» – Чөөн-Хемчиктен Валерий Ондар, «Эң бичии хөөмейжи» – Сүт-Хөлден Мартаа Сарыг-оол.

Бөлүктер: бирги черде Кызыл хоорайдан «Үш-Мөөрүк», ийиги черде
Бай-Тайгадан «Уваң-Шу», үшкү черде Кызылдан «Чаңгы-Хая».