Бо чылдың июль айның 8-9 хүннеринде Чөөн-Хемчик кожууннуң Ийме сумузунуң Кум-Сууга «Алдын кажык» деп регионнар аразының тыва оюннар фестивалы болуп эрткен. Хемчегниң кол черин «Кажыкка аът чарыштырары» деп оюн ээлээн. Кол шаңналы – «Лада гранта» маркалыг автомашина.
Ондар Коңгар-оол аттыг Тыва үндезин культура төвүнге «Кажыкка аът чарыштырары» оюннуң тиилекчизи, чычаанның эдилекчизи Сергей Иргиттиң шаңналдарынга республика чергелиг оюн болуп эрткенин төп дыңнаткан.
Мөөрейге Тере-Хөл, Мөңгүн-Тайга, Тожу, Улуг-Хем, Тес-Хем кожууннарындан болгаш Кызыл хоорайдан 16 киржикчи боттарының күжүн шенеп, маргылдаалажып ойнааннар.
Түңнелинде, кажык оюнунга шылгараан эң-не тергиин, кашпагай Мөңгүн-Тайга кожууннуң төлээзи Виталий Созур-оол богба шаңналынга төлептиг болган. Ийиги черни Тожу кожууннуң төлээзи Айлаң Дүмендей чаалап алган. Тес-Хемден Алдын-оол Эрендей, Алдынай Булак база Чечена Седен 3-кү, 4-кү, 5-ки черлерниң байзазынче киргеннер.
Тыва үндезин культура төвү өгбелерден дамчып келген тыва улустуң мерген угааны, эрес-кашпагай чоруу сиңген «Кажык» оюнун кадагалап арттырарынга, ооң сайзыралынга улуг үлүг-хууну кииргени дээш Сергей Сергеевичиге ѳѳрүп четтиргенин илереткен. Ооң буянныг ажыл-ижи ѳскелерге үлегерлиг чижек болуп, ам-даа сайзыраар-ла болзун!