Дээди шаңналды Мерген-Херел Монгуш аттыг культура бажыңы чаалап алган

Тыва дыл хүнүнде "Уран чүүлдүң күзүнгүзү" фестиваль-мөөрей тыва дыл кырынга шиилерни көрүкчүге бараалгатканын Улусчу чогаадылга төвү дыңнаткан.

Беш шак чартык иштинде алды шиини чүгле тыва дыл кырынга – фестивальдың ийи дугаар хүнүнде шиилерин Эрги-Барлыктың, Хову-Аксының, Чадаананың, Алдан-Маадырның, Шагаан-Арыг хоорайның, Мугур-Аксы суурнуң бот-тывынгыр театр бөлүктери көргүскен.

Драмаларда болгаш комедияларда ынакшылды, өг-бүле харылзаазын, акы-дуңмалышкы хамаарыглаларны болгаш социал айтырыгларны көргүскен.

Улуг улустуң бот-тывынгыр театрларының аразынга болган мөөрейниң түңнелинде Дээди шаңналды болгаш 30 муң рубль түңнүг сертификатты Чөөн-Хемчик кожууннуң Мерген-Херел Монгуш аттыг культура бажыңы "Сес үүлгедиг" деп шиизи дээш алган.

Тускай шаңналдарны база тывыскан. "Тергиин режиссура" – Алдын-Ай Сат Мөнгүн-Тайга кожууннуң культура болгаш дыштанылга төвүнүң "Мен дириг мен" деп драмазы дээш, "Тергиин роль" – Милана Биче-оол, Мөңгүн-Тайга кожууннуң культура болгаш дыштанылга төвүнүң "Мен дириг мен" деп драмазынга кол ролю дээш, "Тергиин ийиги роль" – Алевтина Доржукай, Шагаан-Арыг хоорайның "Элдеп-шоу" театр студиязының "Диирең" деп комедиязында ролю дээш база Айрана Эренчин, Чеди-Хөл кожуундан "Таңды-Уула" культура бажыңының "Кыйгы" деп драмада ролю дээш, "Поэтиктиг дыл" – Эрги-Барлык суурнуң улусчу театры "Ынакшыл болгаш килең дугайында ыры" деп драмазы дээш, "Чидиг социал теманы сойгалааны дээш" шаңналга Алдан-Маадыр суурнуң "Самбажык" аттыг бот-тывынгыр театрының "Амыдыралдың эскиттери, азы ховунуң Хамнаарактары" драмазы төлептиг болган.