ТР-ниң Дээди Судунуң бо чылдың баштайгы аалчылары – Кызылдың 15 дугаар лицейиниң тоску классчылары биле Кызылдың Өг-бүлеге болгаш уругларга социал дуза чедирер төвүнүң кижизиттирикчилери болганын шүүгү чери дыңнаткан. Ужуражылганы эрге-хоойлу билиглериниң неделязынга тураскааткан.
Шииткекчиниң дузалакчызы Аржаана Ширин-оол аалчыларынга экскурсияны эрттирип, судтуң ажыл-чорудулгазы-биле таныштырган. Олар Россияның бүгү суд системазының тургузуу база суд чорудулгазы-биле танышкан. Оолдар болгаш уруглар суд системазының төөгүзүнүң музейин, судтуң хуралдар эрттирер залдарын сонуургап көргеннер.
Чалыы аалчылар кыдат болгаш моол хаанныг күрүне үезинде кем-херек үүлгеткеннерге кандыг кеземче ялазын онаап, совет үеде шииткекчилерни канчаар соңгуп турганын билип алган.
ТР-ниң Дээди Судунуң шииткекчизи Радмира Сендаш уруглар-биле ужуражып, ажылын таныштырып, оларның хөй санныг айтырыгларынга харыылаан.
Школачылар-биле кады келген башкылар ужуражылгадан дыка хөй ажыктыг болгаш солун чүүлдерни билип алганын демдеглеп, эрттирикчилерге четтиргенин илереткен.
Тываның Дээди Судунуң ажыл-чорудулгазын аныяк-өскенге сонуургадып, аңгы-аңгы хемчеглерге киириштирерде, шүүгү чериниң парлалга албаны-биле дараазында дугаарже долгааш, харылзажып болур: 9-48-31.
