ТР-ниң Дээди Судунуң ажылдакчылары Кызылдың транспорт техникумунуң сургуулдарынга экскурсияны эрттиргенин шүүгү чери дыңнаткан.
Келир үениң юристери судтуң ажыл-чорудулгазы-биле танышкан. Ийиги курсчулар судтуң хуралдар эрттирер залдарын, суд системазының төөгүзүнүң музейин сонуургап көргеннер. Суд приставтарының ажылы-биле база танышкан.
ТР-ниң Дээди Судунуң шииткекчизи Влада Куулар уруглар-биле ужуражылга үезинде федералдыг хоойлуларның кол дүрүмнерин, суд системазының, шииткекчилерни эрге-байдалының дугайында чугаалап берген. Ол ышкаш келир үениң юристеринге өөредилгезинче кичээнгейни салырын чагаан. Шииткекчи аалчыларының айтырыгларынга тодаргай харыыларны берен.
Тываның Дээди Судунуң ажыл-чорудулгазын аныяк-өскенге сонуургадып, аңгы-аңгы хемчеглерге киириштирерде, шүүгү чериниң парлалга албаны-биле дараазында дугаарже долгааш, харылзажып болур: 9-48-31.
