Тываның А. С. Пушкин аттыг национал ном саңы саңынга Тываның Улустуң чогаалчызы, этнограф, эртемден, төөгү эртемнериниң доктору М. Б. Кенин-Лопсанның 100 чыл оюнга тураскааткан чурт-шинчилел номчулгалары болуп эрткенин ном саңы дыңнаткан.
Национал ном саңының удуртукчузу И.А. Эртине келген аалчыларга байыр чедирип, чурт-шинчилел номчулгаларын ажыткан. Хемчегниң хүндүлүг аалчылары чогаалчының уруглары – Анна биле Марина Кенин-Лопсаннар, Тываның чогаалчылар эвилелиниң удуртукчузу С.С. Комбу, эртемденнер З.Б. Самдан, В.С. Салчак болганнар.
Номчулгага Бай-Тайга, Өвүр, Чѳѳн-Хемчик, Чаа-Хѳл, Бии-Хем, Кызыл кожууннарындан 17 илеткелчи киришкен. Оларның аразында Кызылдың 5, 17 дугаар школаларның өөреникчилери А. Чооду, Ш. Ланаа, А. Ондар, М. Монгуш солун илеткелдерни номчаан. Чогаалчы М.Б. Кенин-Лопсанга тураскааткан номчулагалар солун болгаш ажыктыг болуп доозулган. Киржикчи бүрүзүнге сертификаттарны тывыскан.
Тываның Улустуң артизи С. Ириль чогаалчының шүлүүнге бижиттинген «Ыраажы-Хем» деп ырыны аалчыларга бараалгаткан, ырының аялгазын О. Сарыглар бижээн. Дараазында «Он-Кум» мода болгаш костюм театрының самчылары «Хамнар» деп самны күүсеткеннер. Оон ыңай республика чергелиг шүлүк мөөрейинниң тиилекчилери аалчыларга чараш шүлүктерин номчуп бараалгатканнар.
Национал ном саңы бо чылды – «Делегейниң дириг эртинези», «Хам чүдүлгениң дириг эртинези» деп хүндүлүг аттарның эдилекчизи Моңгуш Борахович Кенин-Лопсанның чылы кылдыр чарлаан.
