Депутат-биле ажыктыг ужуражылга

Күрүне Думазының депутады Айдың Сарыглар болгаш ооң дузалакчызы Айдыс Ооржак Национал школа хөгжүдер институттуң ажылдакчылары-биле ужуражып, төрээн дылды башкылаарының, келир салгалдарга кадагалап арттырарының айтырыгларын сонуургап келгенин институт дыңнаткан.

Келген аалчылар Реслицейге тыва дыл болгаш төрээн чогаалды башкылап турган башкызын көргеш, аажок өөрээннер. Олар төрээн дылын канчаар өөренип турганын сактып, өг-бүлезинде канчаар чугаалажып турарын, дылды билириниң чугулазын үлежип, ажык чугаалашканнар. Өөредилге яамызы-биле сырый харылзаалыг ажылдаары-биле келген депутаттарның тыва дылга хамаарышкан чидиг айтырыгларны шиитпирлээр сорулгалыг сүмележип келгени коллективке улуг деткимче болур.

Ажык чугаа үезинде Тыва Республиканың өөредилге талазы-биле хоойлузунга немелделер, өскерилгелер киирип болурунга чедир база тыва өгбелерниң дамчыдып, салгал кылдыр арттырып каан өнчүзүнге даянып ажылдаарын сүмелешкеннер. Оон аңгыда өске регионнарда төрээн дылдарын канчаар кадагалап, сайзырадып турар арга-дуржулгазын база деңнеп, делгереңгей чугаалашканнар.