Каа-Хем кожууннуң чагырга чериниң даргазы Евгений Ооржак Дерзиг-Аксы суурда дазылга бажыңының тудуг шөлүнче ажыл-агыйжы үнүүшкүннү кылган.
Амгы үеде объектиде тудуг кылыр шөлдүң белеткел болгаш электри энергиязын кожар ажылдары чоруп турарын чагырга даргазы дыңнаткан. Дазылга бажыңының тудуунуң хүлээникчи организациязы – "Бастион" кызыгаарлыг харыысалгалыг ниитилел. Ында сес санныг техника ажыглалда.
Тудугну долгандыр херимнеп, видеокамераларны эптеп салган. Төлевилел-дөзевилел документилери езугаар, бо чылдың төнчүзүнге чедир оран-саваның ханаларын бүрүнү-биле тудуп доозар. 2025 чылдың төнчүзүнде объектини дужаарын планнаан.
1959 чылда дазылга бажыңының бирги оран-савазын база административтиг черин Бии-Хем кожууннуң Сесерлиг суурга туткан. 1978 чылда тудугну бускаш, Каа-Хем кожууннуң Дерзиг-Аксы суурже көжүрген. Ол ам-даа ажыглалда.
ТР-ниң Күш-ажыл болгаш социал политика яамызы Каа-Хем кожууннуң Дерзиг-Аксы суурга амгы үениң дазылга бажыңының беш чаа оран-савазын тударын дыңнаткан. «Демография» национал төлевилелдиң “Улуг салгал” федералдыг төлевилел шугуму-биле ол сорулгага 1,3 млрд рубльди тускайлаан.
Хамаатыларны болгаш харык-шинээ кызыгаарлыг хамаатыларны хайгаарап-чурттадырынга көрдүнген албан черинде бөгүнде 180 кижи социал ачы-дузаны ап турар. Доктаамал ажаалда херек улустуң 156-зы – улуг кижи болза, 24-ү – бичии уруглар.
«Улуг салгал» төлевилел-биле Дерзиг-Аксы бажың-интернадының чурттакчыларын көжүрер 6800 дөрбелчин метр ниити шөлдүг, хөй ажыглалдыг каът бажыңны тудар улуг сорулга Күш-ажыл болгаш социал политика яамызының мурнунда салдынган. Төлевилелди 2023-2025 чылдарда күүседир кылдыр санаан.
Төлевилелде көрдүнгени болза, комплекстиң төп кезээнге ийи каът административтиг бажың, ийи кыдыынга 180 оруннуг үш каът чуртталга корпустары турар. Администрация база чуртталга оран-саваларынга шупту дөрт лифт кылыр.
Интернаттың социал ачы-дуза алыкчыларының негелделери езугаар таарымчалыг байдалдарны хандырар. Корпустарда аңгы арыгланыр черлиг, ийи орун салыр өрээлдерни тускайлаан болур. Иттинер тергелиг инвалидтер секциязында буфет өрээлдери база турар.
Административтиг оран-савада көрүкчүлер залы, кино көөр чер, номчуттунар черлиг ном саңы, бөлгүмнер болгаш хөгжүм кичээлдеринге, диш болгаш херээженнер эмчилеринге өрээлдерни тускайлаар, сенсорлуг өрээл база бар болур. Эмнээшкинниг күш-ажыл мастерскаяларынга аңгы шөлдерни дериир.
