ТР-ниң Күш-ажыл болгаш социал политика яамызының ажыл-чорудулгазын хандырар төптүң директору Байлак Ондар “Бастион” кызыгаарлыг харыысалгалыг ниитилелдиң ажылчын бөлүү-биле Каа-Хем кожууннуң Дерзиг-Аксы суурда дазылга бажыңында тудуг ажылдарын хынап көргенин яамы дыңнаткан.
Амгы үеде “Өг-бүле” национал төлевилелдиң “Улуг салгал” федералдыг төлевилел шугуму-биле туттунуп турар объектиде ажылдар 81 хууга күүсеттинген. Хамаатыларны болгаш кадыкшылының байдалы-биле харык-шинээ кызыгаарлыг улусту хайгаарап-чурттадырынга көрдүнген социал албан чери 180 оруннуг болур.
Интернаттың социал ачы-дуза алыкчыларының негелделери езугаар таарымчалыг байдалдарны хандырар. Корпустарда аңгы арыгланыр черлиг, ийи орун салыр өрээлдерни тускайлаан болур. Иттинер тергелиг инвалидтер секциязында буфет өрээлдери база турар.
Административтиг оран-савада көрүкчүлер залы, кино көөр чер, номчуттунар черлиг ном саңы, бөлгүмнер болгаш хөгжүм кичээлдеринге, диш болгаш херээженнер эмчилеринге өрээлдерни тускайлаар, сенсорлуг өрээл база бар болур. Эмнээшкинниг күш-ажыл мастерскаяларынга аңгы шөлдерни дериир.
Дазылга бажыңының тудуу яамының доктаамал хыналдазында.
