Доктаамал доскуулдарның ажылын катап тургузар

Республиканың эрге-чагыргалары Орук шимчээшкининге айыыл чок чорук талазы-биле күрүне инспекциязының эргелелиниң доктаамал доскуулдарының ажылын катап тургузуп турар.

Тываның Баштыңы Владислав Ховалыгның дыңнатканы-биле алырга, ТР-ниң иштики херектер сайыды Сергей Кондрашов-биле чоокку үеде Тес-Хем, Чаа-Хөл болгаш Чөөн-Хемчик кожууннарга доктаамал доскуулдарны катап тургузарының дугайында дугурушканнар.

Май айның төнчүзүнде-ле ээн кагдынган оран-саваларны таарымчалыг байдалче киирер болгаш ооң соонда оларның ажылдаар чурумун Иштики херектер яамызының удуртулгазы-биле тодарадыр.

Бөгүн орук-транспорт озал-ондааның болуп турар боттуг чылдагааннары оруктарның шынарының багай болуп турарында-даа, оларның байдалын хайгаарап турар техниканың чедишпезинде-даа эвес, а машина-балгаттың санының көвүдээни, шимчээшкинниң хайымы болур дээрзинге Владислав Ховалыг бүзүрелдиг.

Сөөлгү үш чылдың дургузунда Тывада машина-чычаанның саны 3,2 муң ажыгга көвүдээн. “Башкарылганың культуразын бедидер дээш, кызып турар бис. Бо айтырыгга баш бурунгааргы профилактика кезээде-ле чугула рольду ойнап турар” – деп, ТР-ниң Баштыңы медеглээн.

Тывага Орук шимчээшкининге айыыл чок чорук талазы-биле күрүне инспекциязының эргелелиниң чамдык доктаамал доскуулдары октаттынган турган. Орук-транспорт албанының доктаамал доскуулдарын узуткааны-биле холбаштыр республиканың оруктарынга хөй кижи когаралдыг озал-ондактарның саны көвүдээн, чолаачыларның сагылга-чуруму кудулаан.