Донецк Улус Республикаже Тыва Чазактың төлээлери чоруткан

Тываның Баштыңы Владислав Ховалыг Донецк Улус Республикада долу эвес мөөңнээшкин-биле чоруткан шериг албан-хүлээлгелиглерниң видеодыңнадыының соонда, бодунуң төлээлерин ынаар чоруткан.

Тывадан долу мөөңнээшкин-биле чоруткан чаңгыс чер-чурттугларывыстан видеодыңнадыг социал четкилерге үнүп келирге-ле, Тываның Баштыңы Владислав Ховалыг Донецк Улус Республиканың Чазааның даргазы Виталий Хоценкоже дораан долгаан.

Ында Донецк Улус Республиканың шериглери бис дижир (улусчу милиция) кыдыындан кижилер бистиң чаңгыс чер-чурттугларывыска хамаарыштыр ужур-дүрүм чок хөделип турарын дыңнаткан.

Владислав Ховалыг видеодыңнадыгда адаттынган кижилерниң хөделиишкинери хоойлу езугаар болуп турар бе дээрзин хынаарын Донецк Улус Республиканың Чазааның даргазындан дилээн. Ол ышкаш болган болуушкунну ол-ла черинге сайгарып хынаар кылдыр бодунуң төлээлерин Донецк Улус Республикаже дарый чоруткан.

Тываның Баштыңы Россия Федерациязының Камгалал яамызынче тускай бижикти белеткеп эгелээнин дыңнаткан.

– Долу эвес мөөңнээшкин езугаар Ада-чуртун камгалаары-биле тускай шериг операциязының даалгаларын күүседир дээш, бүгү чурттан адалар, өг-бүлениң эр ээлери, оолдарывыс чоруткан болгай. Шак бо чүүл долу эвес мөөңнээшкин-биле шериг албанынче кыйгырткан шериг албанныгларның эргелерин каржызы-биле хажыдып турар-дыр – Тываның Баштыңы бодунуң блогунда демдеглээн.

Владислав Ховалыг шериг албан-хүлээлгелиглерге база оларның өг-бүлелеринге дуза чедирер чаңгыс аай штабтың удуртукчузу, Тываның Чазааның даргазының оралакчызы Айдың Чюдюкка, тускай шериг операциязының талазы-биле тускай төлээлекчизи Т.Б. Кууларга шериг комиссариады-биле кады, долу эвес мөөңнээшкинче кыйгырткан ынаар чоруткан шериг албан-хүлээлгелиглерниң санын болгаш кымнарыл дээрзин, оларның кайда быжыглаттынганын дарый тодарадыр даалганы берген.

Ол ышкаш балыгланган тыва шериглерниң санын, оларга кайда, кандыг эмчи дузазын кайда чедирип турарын тодарадыр даалга салдынган.