Сүт-Хөл кожууннуң төп эмнелгезиниң медицина ажылдакчылары Курттуг-Даш болгаш Шеми-Аксы деп черлерде малчын аалдарга чедип, көдээ ишчилерниң кадыкшылын шинчилээн.
«Кадык камгалалы» национал төлевилелдиң шугуму-биле келген көжүп чоруур фельдшер-акушер пунктузунда эмчи шинчилгелерин эртер эптиг, таарымчалыг байдалдар тургустунган. Малчыннар кадыкшылын шинчиледип, халдавырлыг аарыгларга удур тарылганы база салдыртып алганнар. Хоочу аарыглыг улус даңзызында улуска эм-таңны база чедирген.
Эмчилерниң бригадаларынга ырак-узак черлерже үнүүшкүннер кылырынга «Дугуй кырында» эмчи пунктузу дыка дузалыг болуп турар.
