Дуржулга солчур чогаадыкчы ужуражылга

Россияның чоннарының культурлуг өнчүзүнүң чылынга тураскааткан «Байлак Тывам эртинези» деп улуг концерт бөгүн, апрель 15-те 17 шакта, Улусчу чогаадылга бажыңынга болуп эртер.

Ук хемчегни республиканың улусчу чогаадылга төвү Тываның «улустуң» болгаш «үлегерлиг» деп бедик аттарны эдилеп чоруур бөлүктерни чыып, эртирер. Түңнел концерт – республика чергелиг көрүлде-мөөрейниң сөөлгү чадазы. Аңаа чеди кожууннардан он чогаадыкчы бөлүктер концерт программазын көргүзер. Ук көрүлдеге хамааржыр чогаадыкчы ужуражылга бөгүн Улусчу чогаадылга килдизинге болуп эрткен. Аңаа «улустуң» болгаш «үлегерлиг» бедик аттарны эдилеп чоруур бөлүктерниң удуртукчулары дуржулга солчуп, бурунгаар сорулгаларын чугаалашканнар.

Улусчу чогаадылга төвүнүң директору, Тываның уран чүүлүнүң алдарлыг ажылдакчызы Елена Ондар ужуражылганың киржикчилеринге Россияның чоннарының культурлуг өнчүзүнүң чылының кол хемчеглри-биле таныштырып, Россия деңнелдиг бедик атты чедип алырының чугулазын, культура талазы-биле грантыларның бөлүктерниң сайзыралынга улуг деткимче болур дээрзин демдеглээн.

2021 чылда Тывадан Россияның күрүнениң улусчу чогаадылга бажыңының эрттирген мөөрейиниң түңнели-биле ийи сая рубль грантызын чаалап алгаш, чедиишкинниг ажылдап чоруур Улуг-Хем кожууннуң «Улуг-Хем» ыры, сам ансамблиниң удуртукчузу Аржаана Доспан ук ансамбльдиң фольклор бөлүүнүң грант чедип алган оруун келгеннерге сонуургадып, дуржулгазын дамчыдып, таныштырылга хевиринге тайылбыр ажылын чоруткан.

Мөнгүн-Тайга, Эрзин, Чөөн-Хемчик, Тес-Хем кожууннардан болгаш Кызыл хоорайдан келген бөлүктерниң удуртукчулары ук ужуражылганы чедимчелиг деп үнелеп, бо чылдың дургузунда ыяк белеткел ажылын чорудуп, культура адырының аңгы-аңгы грант, субсидия программалырынга киржир күзелдерин илередип, ажылының шынарын бедидер сорулганы салып алганын демдеглээннер.