Эрткен чылдың ноябрьда тыва чогаалдың кавайы дижир Дус-Дагга Чогаалчылар сесерлии ажыттынганын Россияның чогаалчылар эвилелиниң Тывада регионалдыг салбыры дыңнаткан. Ында Виктор Көк-оол, Степан Сарыг-оол, Донгак Бегзи, Владимир Серен-оол, Деспил-оол Санчы оларның хөрек тураскаалдарын тургускан.
Бо чылын ол чаагай ажыл-үүле уламчылаан. 95 харлапкан Тываның Улустуң хөөмейжизи, бот-тывывынгыр композитор, шүлүкчү, культура ажылдакчызы, чонунга “Артист” деп адаткан Кызыл-оол Донгакович Санчы болгаш 85 харлапкан чогаалчы, журналист, очулдурукчу Эдуард Люндупович Донгак оларга тураскаалдарны чаңгыс чер чурттуглары тургускан.
Эдуард Донгактың хөрек тураскаалын Чогаалчылар сесерлиинге, Санчы Кызыл-оолдуң хөгжүм херекселинде ойнап, хөөмейлеп орар тураскаалын ооң адын эдилээн Культура бажыңының чанында тургускан. Ол тураскаалдарны чогаалчыларның төрелдери, чоок кижилери боттарының чыгган акша-хөреңгизи-биле тургусканын онзалап демдеглеп болур.
Дус-дагжылар, чогаалчыларның төрел-дөргүлү, ырак-чооктан аалчылар чыглып, байырлыг хемчегни Чогаалчылар сесерлиинге болгаш культура бажыңынга демниг, бедик көдүрлүүшкүннүг эрттирген.
Россияның чогаалчылар эвилелиниң Тыва регионалдыг салбырының даргазы, Тываның Улустуң чогаалчызы Николай Куулар, Россияның чогаалчылар эвилелиниң кежигүннери, шинчилекчи эртемденнер Радион Донгак, Ульяна Донорова, аныяк чогаалчылар Эрик Донгак, Мөңгүн-Сай Ондар, Бай-Белек Монгуш болгаш Тываның Улустуң хөөмейжизи, “Хөөмей” академиязының база бүгү делегейде сурагжаан “Алаш” бөлүүнүң удуртукчузу Бады-Доржу Ондар база улуг өгбелерге хүндүткелин илергейлеп чедип келген.
Дус-дагжылар, төрел чогаалчыларның салгакчылары аалчыларын эки уткуп-хүлээп, хемчеглер эрттиреринге идепкейлиг киришкеннер. Аалчылар Торгалыг ортумак школазында Степан Сарыг-оол аттыг чогаал музейинге чедип, ооң ажылын сонуургааннар. Музей эргелекчизи Светлана Седен-оол башкы нептереңгей тайылбырны кылган.
Ам Дус-Дагда чеди чогаалчыга тураскаалдарны чоннуң, төрелдериниң идепкейи, деткимчези-биле, изиг күзели-биле тургусканы бо. Тывада онзагай суурнуң чурттакчылары аңаа доктаавайн, тус чер чурттуг чогаалчыларга мөгейиишкинниг ажыл-херээн уламчылаар сорулгалыг.