Улуг-Хем кожууннуң Ийи-Тал суурда аграрлыг лицейинге Россияның болгаш Тываның Чогаалчылар эвилелиниң кежигүнү, чогаалчы, прозачы, шүлүкчү Тахир Мекпер-оол база чечен чогаал шинчилекчизи, литература критиги, башкы Радион Донгак өөреникчилер-биле ужуражылганы эрттиргенин Тываның Чогаалчылар эвилели дыңнаткан.
Тахир Мекпер-оол – "Ногаан чыланның хоразы" (2022 ч.) деп проза номунуң автору. Ол бодунуң чогаадыкчы ажыл-ижиниң, канчап тускай тудугжу мергежилдиг кижи шүлүкчү, прозачы апарганын өөреникчилерге сонуургаткан. Өөреникчилерниң айтырыглары база хөй болган. Чогаал ажылы деп чүл, баштайгы шүлүктери канчаар бижиттингенин айтырарга, Тахир Тюлюшович тодаргай харыылап, элээн каш шүлүктерни боду номчуп бээрге, шүлүк номчулгазының онзазын, тускайын элээдилер болгаш башкылар демдеглээннер.
Чечен чогаал шинчилекчизи Радион Донгак дылдар камгалалының болгаш сайзыралының чугулазының дугайында тускай таныштырылганы көргүзүп, албан езузунуң саннарын Сибирьниң түрк дылдыг кожа чыдар чоннарының чижээнге тодаргай тайылбырлаан. Чоннуң чизези, кижи саны, ук күрүне деңнелдиг ажылга киржилге деп чүл деп тайылбырны өөреникчилер дыка сонуургаан. Оон аңгыда Радион Маадыр-оолович чогаалчы деп кымыл деп тайылбырны Тываның Улустуң чогаалчызы Кызыл-Эник Кудажының чогаадыкчы ажыл-ижиниң дугайында чугаазынга тодаргай илереткен.
Тахир Мекпер-оолдуң "Ногаан чыланның хоразы" деп номунда кирген "Ышкындырттынган амы адыры" деп мистиктиг чечен чугаазының сайгарылгазын бөдүүн чижектерге таныштырылга үезинде өөреникчилерге болгаш башкыларга чедингир кылдыр тайылбырлаан.
Ужуражылга үезинде өөреникчилерниң талазындан сонуургаан айтырыгларынга харыыларны аалчылар долу кылдыр бергеннер.
Аграрлыг лицейниң башкылары, өөредилге талазы-биле директорнуң оралакчызы база директорнуң сүмелекчизи Алдын-оол Монгуш чалаан аалчыларынга өөредилге черин таныштырып, экскурсияны чоруткан.
