Чоокта чаа Кызыл кожууннуң Көк-Тейге болган орук далдавас чиик машиналар аразынга болуп эрткен джип-чарыштың эң улуг назылыг киржикчилери 1953 чылда үндүрген ГАЗ-67Б болгаш ГАЗ-69 маркалыг автомашиналар болган.
Турандан Илья Шагаринниң совет «виллис» дээр ГАЗ-67Б маркалыг автомашиназы 1953 чылда үндүрген соонда, Бии-Хемниң райпозунга, ооң даргазын сөөртүр хөлге болуп келген турган. Ону 9 чыл болгаш үндүр бижиптерге, хууда кижи чөпшээредип, садып алгаш шоолуг-даа мунмаан. Дараазында, ол кижиден садып алган ээзи ону база-ла шоолуг мунмайн, 20 ажыг чыл гаражынга тургузуп алгаш эдилээн бооп турар.Ынчангаш Илья Шагаринге ол чиик машина барык үрелбээн, заводтан үнген олчаан келген деп болур. Машинаның дөрт дугуйунуң бирээзи Сталин үезинде үндүрген бойдустан бүткен каучуктан кылган резиналыг болуп турары кайгамчык.
Ынча хөй чылдар иштинде тускай «камналгага» турган ховар машина ам ёзулуг ээзин тып, джип-чарыштар киржикчизи чаңгыс чер-чуртуувус Илья Шагаринниң холунда келгени кончуг эки болган. Тываның төөгүзүнче база кирер ужурлуг ГАЗ-67Б автомашина ам бо хүннерде хоочун мөгелер ышкаш, маргылдааларга хүндүлүг аалчы бооп киржип чоруур.
Аңаа көөрде, «Көк-Тей» джип-чарыштың удуртукчузу Алексей Добровтуң база-ла 1953 чылда үндүрген ГАЗ-69 маркалыг орук далдавас чиик машиназы ээзи-биле ам бо хүннерге чедир Сибирь болгаш бүгү Россия деңнелдиг авточарыштарга киржип, 20 катап чемпионнаан болуп турар. Машинаның ээзи болгаш чолаачызы Алексей Добров, штурманы Евгений Кошкаров-биле чарыштарга киржир хөлгезин кончуг эки байдалда тудуп, моторундан эгелээш дугуйларынга чедир үргүлчү чаартып, септеп турары ооң спортчу назынын улгаттырып чоруур.
Мерген КЫРГЫС