Тываның Чазаанга ноябрьның 26, 27 хүннеринде тергиин күрүне албан хаакчызы мөөрейниң түңнел кезээ болуп эрткен. Мөөрейниң түңнел кезээниң киржикчилери регион экономиказының чамдык адырларын хөгжүдер талазы-биле төлевилел ажылдарын комиссияга таныштырган. Үш дугаар эртип турар хемчегде киржикчилерниң санының көвүдээни бо профессионал мөөрейге сонуургал өзүп турарын бадыткаан.
«Тыва Республиканың күрүне хамааты болгаш муниципалдыг албанны хөгжүдери» күрүне программазы езугаар күрүне хамааты албанының ат-алдарын бедидер болгаш республиканың тергиин күрүне хамааты албан-хаакчызын тодарадып, шаңнаар сорулга-биле «Тыва Республиканың күрүне хамааты албанының тергиин ажылдакчызы 2025» ат дээш мөөрейни организастап эрттирип турар.
Мөөрейге регионалдыг 22 яамы болгаш албан черлеринден төлээлер 38 билдириишкинни киирген.
Тыва Республиканың Баштыңының Администрациязының база Чазак Аппарадының күрүне албаны, кадрлар курлавыры болгаш эрге-хоойлу айтырыгларының талазы-биле департаментизи ону организастап, мөөрейге сонуургал өскенин демдеглеп, чылдың-на киржикчилер санының көвүдеп турары ону бадыткааны айыткан. Ооң-биле чергелештир, организакчыларның бодалы-биле алырга, мөөрей киржикчилерниң санының көвүдээни чижилгениң күштелгенин көргүзүп, ол чүүл күрүне албан-хаакчызының мергежилин бедидеринге база профессионал өзүлдезинге идигни берип турар.
Мөөрейниң төнчү кезээниң киржикчилери хоойлу-дүрүмнер талазы-биле билиглерге, орус дылга, угаан-медерелге шылгалдаларны эрткеш, эң хөй сан алган киржикчилер шылгарап үнгеннер. Ийи хонук дургузунда мөөрей комиссиязы 12 төлевилелди көрген.
Келир неделяда мөөрейниң түңнелдерин үндүрер, а шаңналдар тыпсыр езулал декабрьның ортан үезинде болур. Бирги, ийиги, үшкү черлерни алган киржикчилерге дипломнарны болгаш акша шаңналдарын тыпсыр.
