Эң идегелдиг камгалал – баш бурунгаар тарыдып алыры

Тыва Республиканың Кадык камгалал яамызының 2022 чылдагы сан-чурагайындан алырга, эпидемиологтуг сезон үезинде регион девискээринге саргыга ызырткан 1461 кижи бүрүткеттинген, оларның 52,8 хуузу – бичии уруглар. 163 кижи саргы халдавырындан аараан, 59 кижиге саргы энецефалиди чыпшынган – 2021 чылга деңнээрге, аараан кижилерниң саны 5,3 катап көвүдээн.

Саргы кижини каяа-даа – арга-арыглыг черге, дачага, хоорай кезээнге-даа агаарлап чорда, ызырып болур. Саргының көвүдей бээр үелери – май-июнь айлар.

Саргы ызырыптарга, ол аарыгны баш бурунгаар болдурбас эң-не дээштиг, идегелдиг аргазы – вакцинация.

Кижиниң иммунитединиң күш-шыдалы тургустунуп, белен болуру-биле эртежик тарыдып алырын тускай мергежилдиглер сүмелеп турар.

Кызыл хоорайда Лопсанчап кудумчузунуң 15 дугаар бажыңында «Мир здоровья» аптекадан (тел. 8(394-22) 6-35-91), Калинин кудумчузунда 8 дугаар бажыңда «ФЭУ» аптекадан (тел: 8 (394-22) 6-41-43) саргының халдавырлыг энцефалидинге удур вакцинаны боттары база садып ап болур. Вакцинаның өртээ – 470 хире рубль.