Ээр-Хавак сумузунуң Эдер-Куй девискээринде чурттап турар малчыннарның Шагаазы аныяк малчыннар Аяс биле Алимаа Очур-оолдарның аалынга онза солун, каткы-хөглүг болуп эрткенин Ээр-Хавак сумузунуң Найырал культура бажыңы дыңнаткан.
Ээр-Хавак суму баштыңы Б.Х. Хертек чыглып келген малчыннарга байыр чедирип, белектерни тывыскан. Найырал көдээ культура бажыңының ажылдакчылары ыры-самныг концертин малчыннарга бараалгадып, солун оюн-тоглааны эрттирген.
Малчыннар дүрген кылаш чарыжынга, аргамчы тыртар, узун тыныш, кожамыктар, тевек мөөрейинге идепкейлиг киришкеннер. Херээжен улус аразынга хой көдүреринге Эдер-Куйнуң хоочун малчынны Чойганмаа Салчаковна тиилээн. Эне хойну 35 катап көдүрген.
Очур-оолдарның өг-бүлези мөөрейжилерге шаңналдарны тыпсып, чонун амданныг аъш-чеми, сүттүг шайы-биле хүндүлээн.
