Чөөн-Хемчик кожууннуң чагырга даргазының хүлээлгезин күүседип турар Чойган Монгуш кожууннуң девискээринде доктаамал доскуулда септелге ажылдарын хынап көрген.
Республиканың эрге-чагыргалары Орук шимчээшкининге айыыл чок чорук талазы-биле күрүне инспекциязының эргелелиниң доктаамал доскуулдарының ажылын катап тургузуп турарын сагындыраал.
Май айның төнчүзүнде-ле ээн кагдынган оран-саваларны таарымчалыг байдалче киирер болгаш ооң соонда доскуулдарның ажылдаар чурумун Иштики херектер яамызының удуртулгазы-биле тодарадыр.
Тывага Орук шимчээшкининге айыыл чок чорук талазы-биле күрүне инспекциязының эргелелиниң чамдык доктаамал доскуулдары октаттынган турган. Орук-транспорт албанының доктаамал доскуулдарын узуткааны-биле холбаштыр республиканың оруктарынга хөй кижи когаралдыг озал-ондактарның саны көвүдээн, чолаачыларның сагылга-чуруму кудулаан.
