Ээрбектиң малчыннарының саны немешкен

Анатолий биле Аржаана Өпей-оолдар эрткен чылын Ээрбектиң малчыннарының санынче кирген. Үш ажы-төлдүг өг-бүле «Кыштаг» төлевилелиниң киржикчилери.

Малчыннар кыштаан Бичии Кара-Суг деп черде Кызыл-Дашта тудуп алганнар. Ийи чүс шээр малды алгаш, баштайгы кыштаглаашкынын хүр ажып, хураганнарын онча-менди камгалаан.

Өпей-оолдарның өг-бүлези хоюн чугдуруп алыр дээш шуптузу келген. Ылаңгыя улуг оолдары ачазының солуттунмас дузалакчылары апарган. Өгнүң эр ээзи хойну чугдуруп алырга, малга саргы, кодур болгаш өске-даа аарыглар чыпшынмас болгаш деңгелинге база эки салдарлыг деп демдеглеп турар.

– Ачам суг сөөртүр машинага чолаачылап турган. Ооң-биле кады аалдар кезип тургаш, көдээ ишчилерниң ажылы чымыштыг дээрзин көрүп өскен мен. Чүткүлдүг, ажылгыр-ла болза, кижи күзээнин албан чедип алыр. Чаңгыс чер-чурттугларывыстың бүзүрелин кызымаккай ажылывыс-биле бадыткаар бис.

Эрткен чүс чылдың сезен чылдарында сумувустуң хой чуурунга база ажылдап турган мен. Хой чууру амыр эвес, чогум эвин-биле бээрге, ажыл шуудай бээр.

Кагдынган хой чуур оңгачаны катап тургускаш, ажытканынга сумунуң малчыннары өөрүп турар. Мурнувуста салдынган сорулгаларывыс хөй, ону чоорту амыдыралга боттандырар бис – деп, Анатолий Өпей-оол бүзүретти.

Кожууннуң көдээ ажыл-агый эргелелиниң ажылдакчылары, мал эмчилери кыштагга удаа-даара кээп, малга халдвырлыг аарыгларга удур тарылганы салып, ханын ап турар.

#Кызылкожуун #Ээрбек #Кыштаг #ТМГМедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews