Бора-Тайга сумузунуң Сарыглар Семис-оол аттыг стадионунга тускай шериг операциязынын киржикчизи, адыгжы-штурмовик, дайынчы хөделиишкиннер хоочуну, ефрейтор Аяс Ховалыгның чырык адынга тураскааткан республика чергелиг хүреш маргылдаазын маадырның авазы Галина Ховалыг, өөнүң ишти болгаш чоок кижилери эрттиргенин чагырга чери дыңнаткан.
Хүреш маргылдаазынга дөртен ажыг мөге киришкен. Он ажыг мөге күрүне, артканнары кожуун, суму чергелиг аттарлыг мөгелер.
Тываның Чаан мөгези Айдың Монгуш (Улуг-Хем), шаңналы – 150 муң рубль, Тываның Хартыга мөгези Кайгал-оол Ондар (Сүт-Хөл) үжүүрлешкен, шаңналы – 70 муң рубль. Үшкү-дөрткү черлерде Тываның Начын мөгелери Бады - Маадыр Самдан биле Александр Доржу. Оларга 30-30 муң рубльди тывыскан.
Маргылдааның кол шииткекчизи болгаш чарлакчызы Тываның Начын мөгези Шолбан Монгуш бедик деңнелге эрттирген. Республиканың, кожууннуң хүреш федерациялары болгаш Сүт-Хөлдүң спорт школазының тренер башкылары мөгелерни салып, демниг дузазын көргүскен.
А.С. Ховалыгның чоок улузу мөгелерни изиг аъш-чем-биле хүндүлеп, бирден сесче киргеннерни шаңнап-мактаан.
Кожууннуң, сумунуң удуртулгазы маадыр чаңгыс чер чурттуунуң чырык адын мөңгежидип, сактыышкын езулалын эрттирип, тыва спортту деткип, маргылдааны бедик деңнелге эрттиргени дээш, Аяс Ховалыгның чоок кижилеринге четтиргенин илереткен.
Аяс Ховалыгга Эрес-дидим чоруктуң орденин мөчээниниң соонда тывыскан. Маадырга мөңге алдар!