Улуг-Хем кожууннуң Ийи-Тал суурнуң чурттакчызы Сергек Мандып-оол социал керээге үндезилээн күрүне деткимчези-биле «УАЗ» марканың автомашиназын садып алганын чагырга чери дыңнаткан.
Эгелеп чоруур сайгарлыкчы чаңгыс чер чурттугларын ыяш, хөмүр, сиген-ширбиил белеткээринге, малчыннарның аай-дедир аргыжылгазынга, аът чарыштарынга суурнуң чүгүрүк аъттарын аай-дедир чедиреринге ачы-дузазын көргүзүп турар.
Сергек Мандып-оол хөй ажы-төлдүг өг-бүлелерге дузазын кадып турар. Бо чылын суурнуң хөй ажы-төлдүг, алды оолду азырап өстүрүп чоруур аныяк өг-буле Мерген биле Сылдысмаа Кыргыстарга кыжын оттулар бир чүък кургаг ыяшты дүжүрүп берген.
Суурнуң 90 хар ашкан энези Долчанмаа Кечил-оолга база бир машина ишти кургаг ыяшты чедирген. Кырган-ава хүндүлүг дыштанылгада уруу-биле кады чурттап турар.
Кышка мал чеминиң белеткели – сиген кезилдезиниң үезинде малчын Адар Санчының өг-булезиниң кылган сараат сигенин алаактан сөөртүп эккеп берип, дузазын көргүскен.
Күрүне деткимчезиниң алыкчызы суурунуң кудумчуларының арыг-силиинче улуг кичээнгейни салып, бок аштап төгер ажылдарга база үлүг-хуузун киириштирип турар.
