Эйлиг-Хем школазының капитал септелгези дооступ турар

Тывада бо чылын 27 школаның капитал септелгезин чорудуп турар. Оларның аразынче Улуг-Хем кожууннуң Эйлиг-Хем школазы база кирген.

Өөредилге чылы соонда, капитал септелге эгелеп турда, Эйлиг-Хемге Тываның өөредилге сайыды Алексей Храмцов база кээп чораан.

Удуртуп-баштап турар школазының капитал септелгезиниң кандыг чоруп турарының дугайында школа директору Владимир Дамдын социал четкилерде арынын таварыштыр үргүлчү көргүзүп,тырттырган чуруктарын салып келген.

Ынчангаш ада-иелер-даа, өөреникчилер-даа, чаңгыс чер-чурттуглары-даа, чазак-чагырганың дарга-бошкалары-даа, школада септелге кандыг чоруп турарын Владимир Март-ооловичиниң арынындан көрүп, билип ап турганнар.

Ам бо хүнде Эйлиг-Хем школазының капитал септелгези адакталып, ында класстарда линолеум шывыгны чадып эгелээн.

Капитал септелге удавас доозулган соонда, сентябрь 1-де Эйлиг-Хем школазының өөреникчилери, башкылары, ажылчын коллективи чаартынган, чылыг,чырык школага өөренип, ажылдап эгелээрлер.

Владимир Дамдынның чуруктары