Улуг-Хем кожууннуң Эйлиг-Хем суурдан тускай шериг операциязынче 30 ажыг дайынчы чорутканын чагырга чери дыңнаткан. Оларның аразындан 8-зи амы-тынындан чарлып, хары черге кара бажын салган.
Маадырларны аныяк-өскен, салгалдар утпайн, сактып чорзун дээш оларның ада-иелери, өг-бүлелери, дөргүл-төрели, Эйлиг-Хемниң демниг чону акша-төгериин чыып, тураскаал самбыраны тургускан. Тураскаалдың байырлыг ажыдыышкынынга маадыр оолдарның ада-иелери, өг-бүлелери, чоок улузу чыглып кээп, сактыышкынны кылган.
ТР-ниң Дээди Хуралының даргазы Кан-оол Даваа эйлиг-хемчилерниң тураскаал самбыраны тургусканы өскелерге үлегер болурун демдеглеп, маадыр оолдарның чоок улузунга, Эйлиг-Хемниң демниг чонунга четтиргенин илереткен.
Улуг-Хем кожуундан Дээди Хуралдың депутады, тускай шериг операциязының киржикчизи Мөңге Тагба, кожуун баштыңы Артыш Кара-Сал, кожууннуң чагырга даргазы Эрес Мандан-оол, “Ада-чурттуң камгалакчылары” күрүне фондузунуң кожуунда салбырының координатору Михаил Даспак сөс ап, кыска үениң дургузунда тураскаал самбыраны кылган эйлиг-хемчилерни мактап, чылыг сөстерни чугаалааннар.
Чыылган чон тураскаал самбыраның баарынга дириг чечектерни салып, маадыр оолдарның чырык адын сактып, мөгейгеннер.
Ада-чурт дайынының үезинде-даа, амгы тускай шериг операциязының үезинде-даа биче суур Эйлиг-Хемден дайынчы эки турачылар саны хөй болуп турары – эйлиг-хемчилерниң эрес-дидимин, ада-чуртчу мөзү-бүдүжүн көргүзүп турар.
Эйлиг-Хем суму чагыргазының даргазы Херел Сувак тураскаал самбыраны кылырынга үлүг-хуузун киириштирген чонунга, дузалашкан өөреникчилерге, чуруктарны белеткээн башкыларга өөрүп четтиргенин илереткен.