Аржаан суму чагыргазының удуртулгазы кем-херек үүлгедиишкиннерин болдурбас база эвээжедиринге хамаарышкан «төгерик столду» эрттиргенин чагырга чери дыңнаткан.
Бии-Хем кожууннуң, Туран хоорайның чагыргаларының төлээлери, өөредилге черлериниң удуртукчулары, культура ажылдакчылары, эки турачы улусчу дружиналарның кежигүннери арга-дуржулга солчур хемчегге киришкен. Аржаан сумузунуң удуртулгазы сумуда профилактиктиг ажылдарны канчаар чорудуп турарын таныштырып, келир үеде угланыышкыннарын тодараткан.
Аржаан ортумак школазының директорунуң кижизидилге ажылының талазы-биле оралакчызы Айдана Сайзан-оол өөредилге чериниң профилактика системазы-биле харылзааларның дугайында медээлерни таныштырган.
Алкоголизм болгаш эзиртир суксуннарны хоойлуга удур садып-сайгарары-биле ажылды моон соңгаар күштелдирерде, «Элээр суур» төлевилелиниң күүселдези-биле боттандырган чедиишкинниг практикаларже онза кичээнгейни угландырган.
"Элээр суур" төлевилелдерниң 2023, 2024 чылдарда тиилекчилери – Сесерлиг, Тарлаг, Хадын сумулары, Ленинка арбанның удуртукчулары арга-дуржулгазын үлешкен.
Хемчегниң төнчүзүнде Бии-Хем кожуунда кем-херек үүлгедиишкиннерин болдурбас талазы-биле ажылдың түңнелдерин үндүрүп, эки турачы улусчу дружиналарын, ада-ие хайгыылын, адалар чөвүлелин, төрел аймактарның ажыл-чорудулгазын сайгарып, ук ажылды моон-даа күштелдирер шиитипирни хүлээп алган.
Кожуун чагыргазының профилактика талазы-биле оралакчы даргазының хүлээлгезин күүседип турар Саян Бай-Кара түңнел илеткелди кылган. «Төгерик столга» чогумчалыг арга-дуржулгаларны сайгарып, кем-херек үүлгедиишкиннерин болдурбас болгаш хөй-ниитиниң айыыл чок чоруун быжыглаар талазы-биле кады ажылдаарының келир үеде угланыышкыннарын тодараттывыс» – деп, ол чугаалаан.
Саян Бай-Кара эки турачы улусчу дружиналарны шаңнап, ажылга херек чүүлдерни дамчыткан. Ол ышкаш чаа кежигүннерге шынзылга бижиктерни тывыскан.
Бии-Хемде эки турачы улусчу дружиналарның кежигүннериниң саны немешкен.
