“Эко-объектив” чуруктар мөөрейи уламчылап турар

Экология яамызы бойдус чурумал темазынга “Эко-объектив” чуруктар мөөрейин эрттирип турар.

Тыва Республиканың Арга-арыг болгаш бойдус ажыглалының яамызы Экологтуң хүнүнге тураскаадып “Эко-көрүш” (“Эко-объектив”) деп чуруктар мөөрейин чарлаан.

2022 чылдың июнь 15-ке чедир уламчылаар мөөрейге республиканың шупту чурттакчылары, ажыл-агыйы, социал байдалы, хар-назыны дивейн киржип болур. Чуруктарга төрээн чериниң, республиканың бойдус объектилерин, ол темага хамаарышкан кандыг-даа ажылды чорудуп болур.

Мөөрей ийи аңгы угланыышкынныг:

- “Чурттап турар оран-чуртувус” – маңаа долгандыр хүрээлелди хирлендирип турар чидиг айтырыгларны көргүзер: агаарның хирлии, кайы хамаанчок төкен боктар, хирленген суглар хемнер дээш, оон-даа өске.

- “Мээң биче төрээн черим” – бо угланыышкынга төрээн чериниң кайгамчык, онгазай, дөмейлешпес бойдус чурумалын, дириг амытаннарын, дыштаныр черлерин, аржаан сугларны дээш, хөй талалыг чуруктарны чорудуп болур.

Мөөрейниң киржикчизи чүгле үш-ле хире ажылды чорудуп болур. Аңаа киржир күзелин илереткен бижикти база фоточуруктарын сайтыга салып болурунга чөпшээрелин оргкомитеттиң opersvod.17@mail.ru электроннуг почтазынче чорудуп, “Эко-объектив” мөөрейге деп демдеглээр.