Экономиктиг хөгжүлде яамызы Тывага тускай экономиктиг девискээрни тударын деткииринге белен

Россияның Экономиктиг хөгжүлде яамызының регион хөгжүлдезиниң департамент директору Виталий Алтабаев Красноярскиниң экономиктиг шуулганының “РФ-тиң үлетпүр девискээрлерин хөгжүдери – дээре дээн практикалар” деп темалыг ажыл-агыйжы дискуссия үезинде, албан чери Сибирьниң регионнарындан тускай экономиктиг девискээрлер тударынга чагыгларны манап турарын дыңнаткан.

Бо чылдың төнчүзүнге чедир хөй талалыг эрге-байдалды алыр «Хандагайты – Боршоо» эрттирилге пунктузундан ырак эвесте Моол кызыгаарынга, бизнеске чиигелделиг чурумнуг девискээрни тудар эгелээшкинни Тыва Республика ажылдап кылып турар.

Экономиктиг хөгжүлде яамызының департамент директору Сибирьниң регионнарын бюджет чээлилерин эде санадыр, тускай экономиктиг девискээрлер инфраструктуразының объектилерин тударынга, чаартырынга база эде чаартырынга регионнуң чарыгдалдарын эрттирери, тускай экономиктиг девискээрлер ажылының шынарын бедидеринге инфраструктура бюджет чээлилерин алыры, оларны ажыдары дээн ышкаш деткимчениң федералдыг аргаларын идепкейлиг ажыглаарынче кыйгырган.

Тываның экономиктиг хөгжүлде болгаш үлетпүр сайыды Айдыс Сат тускай экономиктиг девискээрлер тургузар дээн Тываның эгелээшкининиң кайы хире чоруп турарын дыңнаткан. Сайыттың чугаазы-биле алырга, бөгүнде тускай экономиктиг девискээрни тударынга техниктиг-экономиктиг үндезиннерни белеткээн, ам тускай экономиктиг девискээрге ажыл-чорудулганы организастаар хемчеглер дугайында дугуржулгага аттар салыры арткан.

– Красноярскиниң экономиктиг шуулганының үезинде боттуг төлээлер-биле 1,25 млрд ниити түңнүг инвестиция салыышкыннарның дугайында ийи дугуржулгага атты бөгүн салдывыс, бо чоокку үеде үш млрд рубльдиң керээзинге атты салыр боор бис. Инвестиция салыышкыннарының баазалыг түңү сес млрд рубль хире – деп, Айдыс Сат ылавылап айыткан.

Технопарктар, үлетпүр парктары дээн ышкаш, үлетпүр инфраструктуразының кластерин тургузары , ол ышкаш бизнеске чиигелделиг чурумнуг девискээрлерни ажыдары – девискээрлерни хөгжүдер кол арга-хевирлериниң бирээзи болуп турар. Кластер төлевилелдеринге киржип, РФ-тиң Үлетпүр-садыг яамызының шугуму-биле бүдүрүлгелер субсидияны дорт ап болур, ол инвестициялар түңү 30 хуу чедир хемчээлдиг.