Элээдилер база ажылдаар назылыг кижилер хөй аарып турар

Тываның Баштыңынга неделя санында берип турар санитар-эпидемиологтуг байдалга мониторинг медээзинден алырга, халдавырлыг тыныш халдавыры-биле аарыыр таварылгалар неделя санында немежип турар. Ооң мурнунда неделяда республикага 288 ындыг таварылга бүрүткеттинген болза, эрткен неделяда 334 четкен. Грипптээн таварылга демдеглеттинмээн.

Росхереглелхайгааралдың Тыва Республика талазы-биле эргелели халдавырның нептереп тараарын болдурбас дээш, ноябрь 15-тен орайтатпайн, аарып болур бөлүкке хамааржыр кижилерниң 75 хуузун, азы республиканың шупту чонунуң 60 хуузун гриппке удур тарылгаже хаара тударын саналдаан.

Эрткен неделяда аараан улустуң хөй кезии, азы 106 кижи 15 хардан өрү элээдилер база улуг кижилер болган. Чеди хонук дургузунда, аараан кижилерниң 12,9 хуузун, азы 43 аарыг кижини эмнелгеге чыттырган, ооң аразында 14 хар чедир назылыг – 34 бичии уруглар бар.

Октябрь 27-ниң хүнү-биле алырга, гриппке удур вакцинацияже 151 934 кижини хаара туткан, ниити планның 76,1 хуузу азы чурттакчы чоннуң 45,1 хуузу. Кызылда, Улуг-Хем, Барыын-Хемчик, Чеди-Хөл, Мөңгүн-Тайга, Кызыл база Чаа-Хөл кожууннарда вакцина ам-даа артпышаан.

«Совигрипп» база «Ультрикс» вакциналар бар. Назылап кыраан, кадыкшылы кызыгаарлыг, иштиг херээженнер база уруглар дээш аарып болур бөлүктерде чурттакчы чонче онза кичээнгейни углап, тарылга кампаниязын идепкейжидерин муниципалитеттерге сүмелээн.

Ажыл берикчилери 3709 кижини тарыткан. Корум-чурум камгалаар албан черлери ол ажылды идепкейлиг чорудуп турарын эпидемиологтар демдеглээн. ТР-ниң Иштики херектер яамызы албан чериниң ажылдакчыларындан, оларның өг-бүле кежүгүннеринден, пенсионерлеринден 994 кижини, Росгвардия эргелелинден 239 кижини, Россияның Онза байдалдар яамызының Тывада Кол эргелели 160 кижини гриппке удур тарыткан. Россияның Кеземче күүселдезиниң федералдыг албанының Тывада эргелел 2000 ажыг кижини тарыдып, чүгле боттарының ажылдакчыларын эвес, а шииттирген кижилерни база тарыткан.