Тывада поликлиника, дүрген эмчи дузазыныӊ станциязы, фельшер-акушер пунктузунуӊ эмчилеринге ажыл-албан чериниӊ бажыӊын хуужудуп алырын чөпшээрээн.
Республиканыӊ Чазаа чогуур доктаалга өскерилгелерни кииргеш, эмнелге албан чериниӊ бажыӊын бээриниӊ чурумун тайылбырлаан.
Чаӊгыс ол-ла эмнелге черинге 10 чыл дургузунда бирден хөй эвес ставкага ажылдаан кижи албан чериниӊ бажыӊын хуужудуп алыр.
РФ-тиӊ Президентизи кадык камгалалыныӊ эгеки чадазында – поликлиникаларның, дүрген эмчи дузазыныӊ станциязының, фельшер-акушер пунктузунуң ажылдакчыларынга регионнар немей социал деткимче хемчеглерни доктаадыр ужурлуг деп даалга берген.
Ооӊ мурнунда республикага ажыл-албан чериниӊ бажыӊын кым-даа хуужудуп болбас турган. Республиканыӊ эрге-чагыргазы эмчилерге ажылындан алган бажыӊын хуужудуп алырын чөпшээрээш, суурларга ажылдаар кадрларны хаара тудуп, эмчилерниӊ өске регионнарже көжүп чоруурун соксадыр деп турар.
