А. Т. Балган аттыг Улуг-Хемниң кожууннар аразының медицина төвүнүң эмчилери салбыр аайы-биле аңгы-аңны аарыгларга хамаарышкан профилактиктиг тайылбыр ажылын чорудуп, удаа-дараа ажык кичээлдерни болгаш ужуражылгаларны эрттирип турарын чагырга чери дыңнадып турар.
Бо удаада төптүң херээженнер эмчизи Ч.М. Күдерек уругларга «Эрте иштелирге кижиниң кадыкшылынга кандыг хора чедиртинерил» деп темага кичээлди эрттирген. Кеш болгаш шээр аарыглар эмчизи Ш.Э. Доре оолдарга эр-херээжен харылзаа, кайы-хамаанчок харылзаадан тыптып, чыпшынар шээр аарыглар дугайында тайылбырны кылган.
Назы четпээннер ортузунда эрте эр-херээжен харылзаа тудуп, ооң түңнелинде иштелир чоруктар кожуунда демдеглеттинип турар. Шору апарган уруу-биле авазы, оглу-биле ачазы аразында ажык чугааны бо талазы-биле чорудары чугула.
Төптүң эмчилери Шагаан-Арыг хоорайда Тываның тудуг техникумунуң салбырының сургуулдарынга болгаш улуг класстарның өөреникчилеринге назы четпээн кижиниң сайзыралының үезинде өскерлиишкиннерниң дугайында тайылбырны чорудуп турар.