Энерел сеткилдиг хууда сайгарлыкчылар хоочуннарны деткээн

Айдыс биле Айзана Доктугулар Арыскан сумузунда чааскаан чурттап турар хоочун чаңгыс чер чурттугларынга хөмүр-дашты дүжүрүп, ачы-дузазын көргүскенин чагырга чери дыңнаткан.

Энерел сеткилдиг хууда сайгарлыкчылар улуг назылыгларны деткип, ниитизи-биле 14 өрегеге бир-бир тонна хөмүр-дашты бажыңнарынга чедирип, дүжүрүп берген.

Кыштың соогунда оттулар ыяш, хөмүр-даш курлавыры төне бээрге, соок үеде нарын айтырыг апаары билдингир. Ылаңгыя чааскаан чурттап турар өгбелерге оттулар чүүл өртээ өскенде, бо оларга дыка улуг деткимче. Хоочуннар чаңгыс чер чурттуглары – аныяк өг-бүлеге сеткилинден четтиргенин илереткеннер.

Арыскан суму чагырга чериниң ажылдакчылары Шолбан Санчай-оол, Шолбан Даржаа, Радик Сарыг-оол улуг назылыгларның бажыңнарга чедип, хөмүрнү дүжүрүп, киир дажып бээринге дузазын кадып, эрес-шудургу ажылдааннар.