Эпидбайдал: Чаа коронавирус хамчыындан 16 таварылга бүрүткеттинген

Росхереглелхайгааралдың Тыва Республика талазы-биле эргелелиниң медеглээни-биле, Covid-19-тан аарыыры 60 хуу көвүдээн.

Январьның 22-26 хүннеринде республикада чаа коронавирустан аараан 16 таварылга бүрүткеттинген: 7 улуг кижи, 17 харга чедир 9 уруглар.
Стационарлыг эмнээшкинде 5 аарыг кижи бар, оларның байдалы берге. Алды кижи амбулаторлуг эмнээшкинни ап турар. Covid-19-тан аараан кижилерге 50 орунну тускайлаан, ол орун фондузу амдыызында четчир.

Халдавырлыг тыныш аарыгларындан аарыыр чорукту эвээжедири-биле холдарны чуп, арыг-силигни сагыырын санитар эмчилер чагып турар. Оон аңгыда хөй кижилер чыылган черлерге камгалал масканы кедер, эртенги “шүүрээшкинни” чорудуп, аштап-арыглаашкынны кылыр.
Аарыг кижилерни, ылаңгыя бичии уругларны коллективтерже киирерин болдурбас.