Эпидбайдал: Чаа коронавирус хамчыындан 18 таварылга бүрүткеттинген

Росхереглелхайгааралдың Тыва Республика талазы-биле эргелелиниң удуртукчузу Людмила Салчак республикада эпидемиологтуг байдалдың дугайында Чазактың аппарат хуралынга илеткээн. кожууннарында вакцинация кайы хире чоруп турарын дыңнаткан.

Кол санитар эмчи Людмила Салчактың дыңнадыы-биле алырга, эрткен неделяда Тывада чидиг респираторлуг вирустуг халдавырдан болгаш грипп аарыындан 38 хуу, чаа коронавирус халдавырындан аарыыры 38,5 хуу өскен.

Тываның Баштыңы Владислав Ховалыг чер черлерге санитарлыг хемчеглерни күштелдирерин, өөредилге черлеринге эртенги хыналданы катап эгелээрин организацияларның удуртукчуларындан негээн.

– Росхереглелхайгааралдың эпидемияга удур бүгү-ле хемчеглерин сагыырын: хөй кижилер чыылган черлерге камгалал масканы кедип, дезинфекцияны удаа-дараа кылып турарын кыйгырып тур мен. Өрээлдерни агаарладып, дезинфекцияны кылыр херек. Эртенги хыналданы организастаар – деп, Владислав Ховалыг социал четкилерде аппарат хуралының түңнелдерин дыңнаткан.

Неделяның эрткен беш хонуунда, январьның 8-тен 12-ге чедир, чидиг респираторлуг вирустуг халдавырдан база грипптен аараан 1139 таварылга бүрүткеттинген, ооң санында 14 харга чедир 676 уруг аарып турар – деп, кол эпидемиолог дыңнаткан. Республикада аарыыр чорук көвүдеп турар болза, Кызылда харын-даа 20,1 хуу эвээжээн.

Эрткен үе дургузунда 409 кижи аараан, ооң иштинде 14 харга чедир 198 уруг. Эрткен неделяның беш хонуунда чыдып эмнээр салбырларже 35 кижини чыттырган, ооң 28-зи бичии уруглар болган.

Бо сезонда грипптиң А (H3N2) хевири хөй таварышканын дыңнаткан. 2023 чылдың декабрьдан республика девискээринде грипптен аараан бирги таварылгалар демдеглеттинген. Бо хүнде грипптен аараан 78 таварылганы лаборатория бадыткаан: грипптиң А/H3N2 хевири – 59, А хевири – 19.

Covid-19-тан аараан кижилер саны эрткен неделяда көвүдээн. 8 улуг кижи, 17 харга чедир 10 уругда аарыг бары илереттинген.
Халдавырлыг аарыглар эмнелгезинде 15 кижи эмнедип чыдар, оларның байдалы ортумак, үш кижи амбулаторлуг эмнээшкинде.

Covid-19-тан аараан кижилерге 50 орунну тускайлаан, хостуг оруннар бар дээрзин республиканың Кадык камгалал яамызы дыңнаткан. Бир эвес херек апарза 436 оруннуг тускай салбырны ажыдып болур.