Эпидбайдал: Вирустуг халдавыр болгаш грипп аарыы өөскүп болур

Тываның эпидемиолог эмчилери чидиг респираторлуг вирустуг халдавырдан болгаш грипптен аарыыр чорук өөскүп болурун сагындырган. Чыл эгезинден республикада 10 муң чурттакчыга онааштыр чидиг респираторлуг вирустуг халдавырдан болгаш грипптен аараан 834 таварылга бүрүткеттинген, эпидемиологтуг деңнелге 72,5 хуу четпес.

Эрткен неделяга деңнээрге аарыг 14,8 хуу эвээжээнин, Тываның кол санитар эмчизи Людмила Салчак дыңнаткан. Ындыг болзажок, санитар-эпидемиологтуг хемчеглерни суларадып болбас деп, эпидемиолог эмчи айыткан.

Чидиг респираторлуг вирустуг халдавырдан болгаш грипп аарыының катап көдүрлүп болурунуң айыылы бар болганда, профилактиктиг хемчеглерни уламчылаары чугула.

2023 чылдың декабрь төнчүзүнде республикага грипптен аараан бирги таварылга бүрүткеттинген, оон бээр 296 таварылга лабораторияга бадыткаттынган. 97 таварылгада улуг улус аараан. А 17 харга чедир бичии уруглар аразындан 199 таварылганы илереткен.

Эпидемиолог эмчилерниң бодалы-биле алырга, лабораторлуг шинчилелдер түңнелинден көөрге, регионда грипптиң А/H3N2, А болгаш А/Н1N1 хевирлери эргилип, аарыгның ийиги чалгыы болуп болурун оштап турар.

Оон аңгыда, республикада сезоннуг коронавирус биле Сovid-19 аарыы ам-даа таварышпышаан. Февральдың 5-тен 11-ге чедир чаа коронавирус халдавырындан сес кижи аараан, оларның аразында алдызы улуг, 17 харга чедир назылыг ийи уруг бар.

ТР-ниң Кадык камгалал яамызы холдарны чуп, хөй чон чыылган черлерге маскаларны кедип, соталыг телефоннарны аштап чүлгүүр профилактика хемчеглерин сагыырынче хамаатыларын кыйгырган. Чугаалажып турган кижизинче эмин эртир чоокшулавас. Ол ышкаш Чидиг респираторлуг вирустуг халдавырдан болгаш грипп эпидсезону эгелээнден бээр эмнелге албан черлеринде маска кедер чуруму чоруп турарын албан чери сагындырган.