Эрзин кожууннуң төп культура бажыңынга “Тывалар бис” деп ыры-хөгжүм үделгелиг шииниң баштайгы көргүзүү болуп эрткенин чагырга чери дыңнаткан.
Шииниң автору Тываның чогаалчылар эвилелиниң кежигүнү, тускай шериг операцияның киржикчизи, Эрес-дидим чорук ордениниң кавалери, “Шүлүкчү” деп кыйгы аттыг дайынчы Вадим Чыкай, ооң шүлүктеринге аялгаларны Тываның уран чүүлүнүң алдарлыг ажылдакчызы, композитор Аяна Монгуш чогаадып бижээн.
Эрзинниң “Сеңгилең” театры, Аян Кыргыска удурткан бот-тывынгыр аныяк артистер шиини амгы үеде дайын шөлүнде эрес-дидим тулчуп турар акы-дуңмага база төрээн Тывазының адын сыкпайн, Ада-чурту дээш бажын салган маадырларның чырыткылыг овурунга езулуг төлептиг кылдыр тураскаатканнар.
Дайынчылар бо хүннерде Донбасста болуп турар болуушкуннарның ниити байдалын, ында шериг хүлээлгезин күүседип турар Кызылда 55-ки гвардейжи мотоадыгжы даг бригаданың хайгыылчылар ротазының үлегер-чижээнге даянмышаан, ыры-сам-биле дамчыткан.
Мындыг шиини тургузар дугайында баштайгы бодалдан эгелээш, бо хүн четтикпейн манааны көрүкчүге бараалгадырынга чедир улуг ажыл чоруттунган дээрзи билдингир.
Бирги көргүзүгден-не көрүкчүлерниң чүректерин чаалап алган шиини бедик деңнелге салыр сорулгалыг Тываның культуразының мергеннери демнешкен. Тываның Улустуң чурукчузу Начын Шалык, В.Көк-оол аттыг хөгжүм-шии театрын төлээлээн Тываның Улустуң артистери Олег база Саяна Саттар, Тываның алдарлыг артизи Владлена Төмүр база Тываның уран чүүлүнүң алдарлыг ажылдакчызы Алена Дөңгүр-оол баштаан алдар-аттыг сылдыстарның үлүг-хуузу кол черде болган.
“Тывалар бис” деп диңмиттиг шииниң баштайгы көрүкчүлери – тускай шериг операциязының киржикчилери, оларның авалары, өг-бүлелери, чоок улузу сагыш-сеткилиниң ханызындан ойнап дамчыткан уран-чечен көргүзүү дээш аныяк артистерге өөрүп четтириишкинниң чылыг сөстерин илереткен.
“Тывалар бис” деп адын бедик тудуп чоруур эрес-кашпагай эзирлерниң дайын-чаада киржилгезин тускай кылдыр көргүзүп, кыска үеде ыры-самныг чараш шиини Тываның уран чүүлүнүң ховар дээн төлээлекчилери белеткеп тургускан, “Сеңгилеңниң” артистери база бо ажыл-чорудугну эчизинге чедир углап башкарган Эрзин кожууннуң чагырга чериниң даргазы Турген Сагды, культура эргелелиниң удуртукчузу Ольга Куулар, база ол ышкаш төп культура бажыңының болгаш В. Эренчин аттыг ном саңының ажылдакчылары, депутаттар, сумулар даргалары, хөй-ниити албан черлериниң удуртукчулары болгаш чон деткээн.