Чаа-Хөл сумузунда келир үениң мөгелерин өстүрер, кижизидер спорт залының тудуунда ажыл кидин түлүк. Бөгүнде бо улусчу тудугнуң ажылдары чеден хуу күүсеттинген.
«Эзирлер уязы» төлевилел-биле биче хемчээлдиг спорт залының тудуу эрткен чылдың сентябрь айда эгелээн. Ук тудугда Чаа-Хөл кожууннуң С.М Сарбакай аттыг спорт школазының, Ак-Дуругнуң, Булуң-Теректиң тренер башкылары болгаш ажылдакчыларын хаара туттунган. Ниитизи-биле чээрби хире кижи ажылдап турар.
Чаа-Хөл кожууннуң аныяктар херектериниң болгаш спорт талазы-биле килдис начальнигиниң хүлээлгезин күүседип турар Владислав Сарбакайның чугаалап турары-биле алырга, «Эзирлер уязын» май-июнь айда ажыглалче киирер.
– Чаа-хөлчүлер бир демниг тудугда киржип, график езугаар квартал аайы-биле, албан черлери тудугжуларны ашкарып-чемгерип, үлүүн киирип турар. Ол ышкаш кожууннуң малчыннары деткикчилеп, малын эккеп бээрлер.
Чаа-Хөл кожууннуң чагырга чери чылыдылга системазының материалдарын садарынга 400000 рубльди кады акшаландырган. Ам тудуг объектизиниң иштики шеверлел ажылдары база чылыдылга системазын кожары арткан – деп, Владислав Сарбакай тудуг ажылын таныштырды.
Республикада күш-культура болгаш спорт-биле өңнүктешкен уругларның болгаш аныяктарның саны хөй. Көдээ суурларга спорт объектилерни ажыглалче киирген соонда, оларның саны оон-даа көвүдээри билдингир.
Эрткен чылын Чаа-Хөл кожуунда ийи спорт школазы ажыттынган. Ак-Дуругда ангар хевирниң спорт школазы, Булуң-Теректе “Эзирлер уязы”.
Чаа-Хөлде “Эзирлерниң уязындан” Тываның Арзылаң мөгези Айдың Отчуржап, Начын мөгези Артыш Монгуш ышкаш мөге эзирлер ужуп, девип үнер деп тус черниң чону санап турар. Чаа спорт залындан тыва болгаш өске-даа хүрештерниң эрес-кашпагай мөгелери шүүргедеп үнери чугаажок.
