Эрге-чагырганың ажык-чарлыын бедидеринге идигни бээр рейтинг

Тываның Баштыңы Владислав Ховалыг чоннуң бо-ла салыр айтырыгларның хемчээлин эвээжедир дээш, республиканың күүсекчи эрге-чагырга органнарының удуртукчуларынга база кожуун чагырга даргаларынга шынарның өзек көргүзүглерин тургузарын дааскан.

Ол көргүзүглер удуртукчуларның чурттакчы чоннуң чидиг айтырыгларынга тайылбыр ажылын экижидеринге, эрге-чагырганың ажык-чарлыын бедидеринге идигни бээр. Адрезинче хамаатылардан эвээш дыңнадыглар болгаш хомудалдар кирген албан черлери болгаш чагырга удуртукчуларының ажылын эки деп санаар.

Чон-биле удур харылзаада “эки” болгаш “багай” ажылдыг удуртукчуларны илередир сорулга-биле, күүсекчи эрге-чагырга болгаш тус чер бот-башкарылга органнарының ажык дөстерден кирген чоннуң чагаа-бижиктери-биле ажылдап турарынга рейтингини тургузарын Регион башкарылгазының төвүнге онааган.

2022 чылда Тываның Регион башкарылгазының төвү күүсекчи база муниципалдыг эрге-чагырга органнары-биле кады хамаатылардан 61 муң ажыг бижик-дилеглерни алгаш, ажылдаан. 2021 чылга деңнээрге ооң саны 27 хуу эвээш (2021 чылда – 83 822 бижик-дилеглер).

Черлик ыттар, шимчевес өнчүге база чер участоктарынга өртек өйлээшкини, өскүстерни бажың-биле хандырары, шынарлыг эмчи дузазын көргүзери, эмчилерниң база башкыларның чедишпези – 2022 чылда эң-не чидиг айтырыглар болган.