Социал керээге үндезилээн күрүне деткимчезиниң ачызында Барыын-Хемчик кожууннуң Эрги-Барлык суурдан беш өг-бүле хууда дузалал ажыл-агыйын ажыткан. Оларның үжү бызаалыг ийи инекти, бир өг-бүле герефорд уксаалыг үш молдурганы садып алган.
Эрги-Барлыктың чонун дагаа чуургалары-биле хандырар дээш, Артыш биле Чойган Донгактарның өг-бүлези бо чылын 40 дагааны садып алганнар. Өгнүң кыс ээзи садыгжы. Ооң ада-иези дагаалар тудуп турган болгаш ол кушту канчаар азыраарын дыка эки билир.
Донгактар үш ажы-төлдүг. Ажылгыр, кежээ өг-бүле июль айдан бээр дагаа чуургаларын чаңгыс чер-чурттугларынга садып эгелээр деп турар.
Кызымаккай кижилерге амыдырал-чуртталгазын экижидип ап болурунга күрүнеден дээштиг дуза – социал керээ дээрзин арга-дуржулга көргүскен.
#Барыын_хемчиккожуун #Эрги_барлык #Социалкерээ #Хуудадузалалажыл_агый #ТМГМедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews
